يوسف أسكور /
برَّاكة غادية على روايد
لا جاج….
لا سباغة ….
لا كراسة ….
ما كَيْن غير شارجي ….
البكَر وعمّر وزيد
ما قدى فيها شانطي محفر
ولا …كسايد
الطالع مفقود ..
والنازل جيبو خوا …!!
بعد ما كان مسدود
قتلونا بالوعود
أسطول جديد كَالو …
غ يكون أول مرَّة في المغرب
ما شفنا …ما ركبنا
دخنا ….بالوقفة والكدوب
وحليبنا بالنخيض ولَّى رايب
رزقك يتسرق من الجيب
ؤ فين ما كان شي مريض
على ضهور البنات …يبرَّد الغدايد
عيب يا هد الناس عيب
لا طوبيسات لا خدامة …
لا راحة…… لا أمن …
كل شي في هد الوكالة سايب
شيفور في غرام وحدة دايب
خلالصي يقلب ع المصايب
كنترول وجهو خايب
كَال ليك من أجلكم خدامين
هما يهزو غير ..
سراولهم اللي ناصلين
وعناكَهم بالسلاسل عامرين
وبالخواتم مزيّنين
كَدام البنات عايقين
ومن الكَزمارة والشفارة مخبيين
ما عرفت منين جايين هدو …منين ؟؟
طلع ..طلع خلِّي الطوبيس يزيد
أرَّا زيد …أرَّا زيد ..
خسارة فيه كلمة الحديد
