تقهرنا وجيبنا خوا وعيينا بسير واجي ومقضينا حتى غراض ..هذه ارتسامات العديد من المرتفقين لوكالة التحفيظ بأسفي ..فوضى واكتظاظ أمام مكاتب الموظفين يحسن عوانهم كاين لي كيلقاك بإبتسامة وكاين لي ممساليش حتى يشوف فيك بكثرة الملفات أو بالأحرى يضحك في وجهك ..الموظفين قلال والمواطنين هاجمين على المكاتب يحاولون تنظيم أنفسهم ولكن البحر كبير كاين لي باغي غير يسول فين وصل الملف أو يستفير شي حاجة خاصو نهار وهو واقف وأما لي دافع شي ملف غير ينساه ..مكاين غير خلص وزيد خلص فينما ضرتي خاصك تخلص بالثمن لي قالو ليك مكاين لا باريم معلق لا والو شكون كيحدد الأثمنة الله وأعلم ..المحافظ في الصباح دائما في اجتماع ومن وراء الظهر كاين ولكن كل مرة محافظ جديد يلاه جا ويلاه كيقاد في الأمور وبالطبع خاصو شحال باش يضبط الوضع والمواطن في دوامة ..
هذا من جهة ، من جهة أخرى سولنا على ملف التحفيظ الجماعي بالعالم القروي وعلاش جماعات قروية استطاعت أنها تحفظ كلشي فابور بحال جماعة مول البركي في حين أن جماعات بدات في التحفيظ الجماعي وتوقف فجأة وبقات الناس كتسنى من كورونا الى يومنا هذا ..الساكنة ديال خط أزكان ملي شافت هادشي طوال والتحفيظ موصلش عندهم مشاو بغاو يحفظوا لقاو الثمن ديال التحفيظ وصل أثمنة خيالية الخدام الواحد حوالي 2400 درهم فيحين كان لا يتعدى 900 درهم هذا دون احتساب باقي المصاريف ..وزائد أن واحد حفظ فابور وجاروا غادي يخلص واش هادي هي العدالة الإجتماعية والسواسية بين المواطنين هادشي كيخلق الإحتقان بين الناس ..ولي معجبوش الحال يمشي يشكي في المنصة الإلكترونية وهذا هو الضحك على الذقون دايرين بانضة تضرب فيها الكرة وترجع ليك ..
مصدر من مجلس جماعة خط أزكان أكد لينا بأن مسطرة التحفيظ الجماعي بالمنطقة شابتها التلاعبات فالشركة المكلفة بالتحفيظ ولي كان مقررا لها تحفيظ 16 ألف بقعة لم تحترم المساحة المعمول بها لي هي 2500 متر مربع أي جوج خدامة ونصف وقامت بتحفيظ الخدام الواحد ونص خدام عن طريق تقسيم الأراضي على الورثة وبالتالي استنزاف الكوطا المتفق عليها وعدم استكمال التحفيظ الجماعي مضيفا أن هادشي دخلت فيه السياسة ولي عندو مو في العرس راه ضغط من الفوق على المحافظة ودوزو ليه الجماعة كاملة ولي معندوش مو في العرس كيخلو ليه الجماعة و الساكنة ديالها بلا تحفيظ ..
السؤال .. واش المحافظة العقارية مكاينش شي جهة لي كتحاسبها وتراقب عملها ؟ كيفاش يتم رفع أثمنة التحفيظ من منطقة إلى منطقة دون إشراك باقي المتدخلين ؟ ودون إعلام المواطنين ؟ وشكون يحمي المواطن من هاد الزيادات ؟ شكون المسؤول عن توقف التحفيظ الجماعي بخط أزكان ؟ علاش الباريم ديال الاثمنة ممعلقش للعموم في الوكالة ؟ وعلاش التمييز بين المناطق والمواطنين شي يحفظ فابور وشي يخلص بأثمنة خيالية؟ متى تستقيم الأمور في هاد المحافظة ويخرج المواطن راضي على داكشي لي خلص و على عمل الوكالة ؟
