الكل بآسفي يتساءل علاش الثروة السمكية تراجعت !؟ ولا المواطن كيمشي للمرسى في عز الصيف وكيلقاها كتصفر .. باركوات قلال لي داخلين والسردين مكاينش ..فين عمر آسفي كيدخلها السردين من سيدي إفني وكيتباع في المرسى بعدما كان السردين كيمشي بالأطنان لگوانو ..
الباركوات ولاو كيدخلو بالليل وماخفي بالليل كان أعظم ، وديك البركة ديال السردين كتهز لكازا والناظور ومدن الشمال ومع الصباح قشرة مكيلقاها المواطن حتى وصل للدرويش ب 25 درهم للكيلو وأكثر ، ولات عاصمة السردين كيدخلها السردين من الصحرا..
واش الصيد العشوائي والقضاء على المبايض ديال الحوت هو السبب ؟ واش جشع وطمع التجار ؟ واش عوامل أخرى خلات السردين وحتى الحوت بجميع أنواعه يقلال بآسفي ؟!
هادشي يدق ناقوس الخطر بضرورة تدخل المسؤولين باش يلقاو الحل لأن الدرويش تقهر ، والمرسى وشواية السردين كتستقطب البراني وكتساهم في دعم السياحة بالمدينة ..
